Ezekiel 23

ODade Ababili Abayizifebe

1Ilizwi likaJehova lafika kimi lisithi:

2“Ndodana yomuntu, kwakulabesifazana ababili, amadodakazi omfazi munye. 3Baba ngamawule eGibhithe, beqalise ubuwule kusukela ebutsheni babo. Kulelolizwe amabele abo abanjwabanjwa lengaphambili yabo yaphathwaphathwa. 4Omdala wayethiwa ngu-Ohola, umnawakhe engu-Oholibha. Babengabami njalo bazala amadodana lamadodakazi. U-Ohola yiSamariya, u-Oholibha kuyiJerusalema.

5“U-Ohola waqalisa ubuwule esesengowami; njalo wakhanuka izithandwa zakhe, ama-Asiriya – amabutho 6agqoke okulifefe, ababusi kanye labalawuli bebutho, bonke babengamajaha amahle, kanye labagada amabhiza. 7Wazinikela njengewule kubo bonke abaphakemeyo base-Asiriya njalo wazingcolisa ngezithombe zabo bonke abakhanukayo. 8Kabudelanga ubuwule abuqalisa eGibhithe, lapho amajaha alala laye ebutsheni bakhe, ambambabamba ngaphambili, athululela lezinkanuko zawo phezu kwakhe.

9“Ngakho ngamnikela kuzithandwa zakhe, ama-Asiriya, ayewakhanuka. 10Amnqunula, athatha amadodana lamadodakazi akhe yena ambulala ngenkemba. Waba yisiga phakathi kwabesifazana, wajeziswa.

11“Umnawakhe u-Oholibha wakubona lokhu, kodwa ngenkanuko lobuwule bakhe wayexhwale kakhulu kulodadewabo. 12Laye wakhanuka ama-Asiriya – ababusi labalawuli bebutho, lamabutho agqoke okupheleleyo, labagadi bamabhiza, lawo wonke amajaha amahle. 13Ngabona ukuthi laye wazingcolisa; bobabili bahamba ndlelanye.

14“Kodwa yena ubuwule bakhe bengezeleleka futhi. Wabona amadoda efanekisiwe emdulini, izithombe zamaKhaledi ezifanekiswe ngokubomvu, 15zilamabhanti ezinkalweni zazo njalo zilamaqhiye alengayo emakhanda azo; zonke zikhanya angathi yizikhulu zezinqola zempi zamaBhabhiloni, inzalo yaseKhalediya. 16Kwathi khonokho nje ebabona wahle wabafisa wasethuma izithunywa kubo eKhalediya. 17Ngakho afika kuye, alala laye, njalo ezinkanukweni zawo amngcolisa. Emva kokuba esengcoliswe yiwo, wasuka kuwo enengekile. 18Kwathi lapho esesenza ubuwule bakhe obala njalo eveza lobunqunu bakhe, ngasuka kuye nginengekile, njengoba ngangisukile kudadewabo. 19Kodwa banda ngamandla ubuwule bakhe esekhumbula izinsuku zobutsha bakhe, lapho wayeliwule eGibhithe. 20Khonale wakhanuka izithandwa zakhe, ezazilezitho zangaphambili ezazifana lezabobabhemi, zikhihliza okufana lokwamabhiza.

21Ngakho walangazela isigweba sasebutsheni bakho, lapho okwathi useGibhithe ingaphambili yakho yabanjwabanjwa lamabele akho aphathwaphathwa.

22“Ngakho-ke, Oholibha, nanku okutshiwo nguJehova Wobukhosi: Ngizakwenza izithandwa zakho zikuvukele, lezo owazitshiya unengekile, njalo ngizaziletha kuwe ukuba zimelane lawe zivela emaceleni wonke –

23amaBhabhiloni lamaKhaledi wonke, amadoda asePhekhodi laseShowa kanye leKhowa, lama-Asiriya wonke elawo, amajaha amahle, wonke angababusi labalawuli bebutho, izinduna zezinqola zempi lamanye amadoda alezikhundla ezinkulu, bonke begade amabhiza.

24Bazakuzakuhlasela ngezikhali, izinqola zempi lezinqola zokuthwala, njalo belexuku elikhulu labantu; bazaviva ukulwa lawe emaceleni wonke belamahawu amakhulu lamancane njalo belezingowane. Ngizakunikela kubo ukuba bakujezise, njalo bazakujezisa ngokumayelana lemithetho yabo.

25Ngizakwenza intukuthelo yobukhwele bami imelane lawe, njalo bazakuphatha ngolaka. Bazaquma izimpumulo zenu lezindlebe zenu, njalo abenu labo abazasala bazabulawa ngenkemba. Bazathumba amadodana enu lamadodakazi, njalo abenu labo abazasala bazaqothulwa ngumlilo. 26Njalo bazakuhlubula izigqoko zakho bathathe leziceciso zakho ezinhle. 27Kanjalo-ke ngizaqeda isigweba lobuwule owabuqalisela eGibhithe. Kawuyikukhangela lezizinto uzikhanuke loba ukhumbule iGibhithe futhi.

28“Ngoba nanku okutshiwo nguJehova Wobukhosi: Sekuseduze ukuba ngikunikele kulabo abakuzondayo, kulabo owasuka kubo unengekile. 29Bazakuphatha ngenzondo njalo bathumbe yonke into owayisebenzelayo. Bazakutshiya unqunu uze, njalo ihlazo lobuwule bakho lizavela obala. Isigweba sakho lobuwule 30kwehlisele lokhu phezu kwakho, ngoba wafisa izizwe wazingcolisa wena ngokwakho ngezithombe zaso. 31Ulandele indlela kadadewenu; ngakho ngizabeka inkezo yakhe esandleni sakho.

32“Nanku okutshiwo nguJehova Wobukhosi: “Uzanatha inkezo kadadewenu, inkezo enkulu ezikileyo futhi; izaletha ukuhlekwa lokuklolodelwa, ngoba ithwele lukhulu. 33Uzakhulelwa yikudakwa losizi, inkezo yokuchitheka lokuphundleka, inkezo kadadewenu iSamariya.

34Uzayinatha uyibhije; uzayiphahlaza ibe yizicucu udabule amabele akho. Sengikhulumile, kutsho UJehova Wobukhosi.

35“Ngakho nanku okutshiwo nguJehova Wobukhosi: Njengoba usungikhohliwe wangifuqela ngemuva kwakho, kumele uthwale imivuzo yesigweba sakho kanye lobuwule bakho.”

36UJehova wathi kimi: “Ndodana yomuntu, uzakwahlulela u-Ohola lo-Oholibha na? Ngakho melana labo ngezenzo zabo ezinengayo,

37ngoba benze ubufebe njalo lezandla zabo zilegazi. Bafeba lezithombe zabo; banikela labantwana babo ababengizalele bona, njengokudla kuzo. 38Njalo benze lokhu kimi: Ngasonaleso isikhathi bangcolisa indlu yami engcwele batshaphaza lamaSabatha ami.

39Ngalo kanye usuku abanikela ngalo abantwana babo ezithombeni zabo, bangena endlini yami engcwele bayingcolisa. Lokho yikho abakwenzayo endlini yami.

40Bathuma lezithunywa ebantwini ukuba beze bevela khatshana, kwathi sebefikile wabagezela, wacomba amehlo akho wasufaka leziceciso zakho. 41Wahlala embhedeni omuhle, kuletafula elilungisiweyo phambi kwawo owawufake phezu kwayo impepha yami lamafutha ami.

42“Umsindo wexuku elalithokoza wawumzungezile; amaSebhiya ayelethwe evela enkangala kanye lamadoda avela exukwini elixokozelayo, njalo bafaka amasongo ezingalweni zowesifazana lodadewabo kanye lemiqhele emihle emakhanda abo. 43Lapho-ke ngalowo owayesegugiswe yibufebe ngathi, ‘Khathesi kabamsebenzise njengewule, ngoba lokho yikho konke ayikho.’ 44Balala laye. Njengabesilisa belala lewule, ngokunjalo balala lalabobafazi abalesigweba, u-Ohola lo-Oholibha. 45Kodwa abantu abalungileyo bazabanika isijeziso sabesifazana abafebayo njalo bachithe legazi, ngoba bayizifebe njalo lezandla zabo zilegazi.

46“Nanku okutshiwo nguJehova Wobukhosi: Baletheleni ixuku limelane labo beselibanikela kukho ukwesaba lokuphangwa. 47Ixuku lizabatshaya ngamatshe libajuqe ngezinkemba; lizabulala amadodana abo lamadodakazi litshise izindlu zabo ngomlilo.

48“Ngizakuqeda kanjalo ukuxhwala elizweni, ukuze bonke abesifazana baxwayiseke njalo bangenzi njengani. 49Lizajeziselwa ukuxhwala kwenu njalo lithwale lemivuzo yezono zenu zokukhonza izithombe. Lapho-ke lizakwazi ukuthi mina nginguJehova.”